قصيدة اضحك خلى الحزن بروح من ديوان (من القلب) للشاعر خالدالطيب

اضحك خلِّي الحزن يروح

ارقص…غنِّي.. لو مسموح

عيش أوقاتك لعب وفرح

واملا الدنيا أمل وطموح

ارسم بسمة ف عيون غيرك

عرَّف كل الناس بارادتك

وانك تقدر لحظة تغيَّر

وان البسمة دي من رسمك

اصنع سكة طويلة بحلمك

كل الدنيا تمشي عليها

وازرع ورد شمال ويمين

خلِّي الكُل وراك يرويها

واثبت إن العالم كله

راح يتعلم من إصرارك

والمعجزة مش إنك تبني

المعجزة تحسن بُنيانك

واضحك خلِّي الحزن يروح

ارقص…غنِّي لو مسموح

اكتب اسمك بعد تحدِّي

بعد ما تبقى قدوة لغيرك

إيه معنى الأيام هتعدِّي

لو مش راسم خط لسيرك

اضحك خلِّي الحزن يولِّي

عيش في الدنيا كإنك طير

رفرف يالا بحلمك علِّى

واعلَى بصوتك قول للعالم

انا مش طير مكسور وأسير

اضحك خلِّي الحزن يروح

ارقص…غنِّي لو مسموح